#廣告回帶：機場保安新措施 100毫升你要知
日前，立法會議員馬逢國離港，竟然可以無視機場保安「唔再新」嘅措施，成功hand carry 一支200g容量嘅髮Gel 上機。為此，小編有幾條問題，想當面問下馬議員：
一、其實你鍾意Gel 咩頭？蛋撻頭、All Back 頭，定係雞冠頭？
二、就蘋果圖片顯示，你係喺百佳 International 購買呢支GATSBY 定型啫喱膏（濕硬）嘅，而喺百佳網站買就盛惠$39.9一支。唔知你滿唔滿意呢支嘢塑造嘅Wet Look 呢？
三、睇返民航處舊廣告，淨係話藥物同嬰兒食品可獲豁免遵守保安措施，唔知你當支髮Gel 係藥物定嬰兒食品呢？
四、你提及自己係議員，但又話呢種行為唔係「撻朵」，咁你會點形容呢種行為？
五、其實，你身為體育、演藝、文化及出版界議員，為所屬界別做過啲乜嘢呢？
附錄：歷年高官撻朵事件簿
1998年「A1」事件
時任特首夫人董趙洪娉，遭市民於電台烽煙節目踢爆曾投訴頭等機艙較闊落的A1位置被其他乘客佔去，更要求將該位置讓出，期間更反問其他乘客「你知唔知我係邊個？」此後董太即被起名「A1」。
2009年「蘇卡片」事件
時任商務及經濟發展局副局長蘇錦樑，被揭以其副局長卡片代替入息證明為家中外傭續期留港工作，獲入境處酌情批准申請。「蘇卡片」一名亦因而於網上流傳，廣為網民恥笑。
2016年「叫我梁特首」事件
時任特首梁振英之女梁頌昕準備登機時發現有行李遺漏於機場禁區外。其母唐青儀要求航空公司職員將行李送入禁區內不果，梁頌昕遂致電梁振英並交職員接聽。職員以「梁生，你好！」打招呼，梁振英即要求「叫我梁特首」向職員施壓。其後有機場職員向報章爆料而被解僱，「特事特辦」惹來各方不滿更引發大型集會。
片源：蘋果日報、民航處宣傳短片（2007）
